МҮЭ-ийн холбооноос шалган бүртгэх товчоодод МХЕГ-тай хамтран үзлэг хийж эхэллээ


Баянзүрх, Яармаг, Баруунтуруун, Эмээлтийн шалган бүртгэх товчоодод хяналт шалгалтын чиг үүргийг хэрэгжүүлж байгаа төрийн албан хаагчдын хөдөлмөрийн аюулгүй байдал, эрүүл ахуйн шаардлага хангасан хамгаалах хувцас хэрэгсэл, стандартад нийцсэн амны хаалт, гар ариутгагч зэрэг шаардлагатай зүйлсээр хангагдаж байгаа байдал болон ажлын нөхцөл байдалд хамтарсан үзлэг хийж, цаашид авах арга хэмжээний санал боловсруулах зорилгоор үзлэг хийж эхэллээ.
МҮЭ-ийн холбооны дэд ерөнхийлөгч С.Эрдэнэбат, МХЕГ-ын Нийгмийн хамгааллын улсын байцаагч П.Хорлоо нарын баг “Өлзийт” 1, 2 дугаар пост, Морингийн давааны товчоодод өнөөдөр ажиллалаа.
Үзлэгийн багийнхан “Өлзийт-1” товчоонд очиход НМХГ, Онцгой байдал, Мал эмнэлэг, Өрхийн эмнэлэг, Хүрээлэн буй орчны агаарын чанарын газар зэрэг байгууллагуудын 10 гаруй ажилтнууд үүргээ гүйцэтгэж байв. МҮЭ-ийн холбооны дэд ерөнхийлөгч С.Эрдэнэбат ажилтнуудтай уулзаж, ажлын зорилгоо товч танилцуулаад, Ажил, амралтын цагийн зохицуулалт, нэмэгдэл цалин хөлс олгож байгаа эсэх, ХАБЭА-н нөхцөлийг хангах хүрээнд аюулгүй байдал, эрүүл ахуйн шаардлага хангасан хамгаалах хувцас хэрэгсэл, стандартад нийцсэн амны хаалт, гар ариутгагч зэрэг шаардлагатай зүйлсээр хангагдаж байгаа эсэхийг асууж лавлалаа.
Ажилтнууд 24/48 цагаар ажиллаж байгаа ба зарим байгууллагын хоолны мөнгө бага, маск, ажлын хувцас олголт хангалтгүй гэдгийг хэлж байлаа. Тэд өдрийн хоолны мөнгөө нийлүүлж ажлын байрандаа хийж идэж байгаа гэлээ. Мөн ажлын байрны багтаамж бага, ариутгал цэвэрлэгээ хийх нөхцөл боломж тааруу байгаагаа ч нуусангүй.
Үзлэгийн дүнг илтгэх хуудсаар МҮЭХ-ны ерөнхийлөгчийн зөвлөлийн хуралд танилцуулж, ээлжийн цагийн хуваарь, хоол цай, хөдөлмөр хамгаалал зэрэг асуудлаар цаашид авах арга хэмжээний санал боловсруулна. Үзлэгийн явцад хөдөлмөрийн харилцааны хууль тогтоомжийн зөрчил илэрсэн тохиолдолд зөрчлийг арилгуулах арга хэмжээг холбогдох хууль тогтоомжийн дагуу авна гэдгээ МҮЭ-ийн холбооны дэд ерөнхийлөгч С.Эрдэнэбат энэ үеэр илэрхийлсэн юм.

Үзлэгийн нэг багийг МҮЭ-ийн холбооны ерөнхий нарийн бичгийн дарга Г.Адьяа ахлан МХЕГ-ын Хөдөлмөрийн хяналтын улсын ахлах байцаагч С.Баяраа, МҮЭ-ийн холбооны ХХХБГ-ын дарга Ц.Отгонтунгалаг нарын бүрэлдэхүүнтэй Баруун туруун, 61-ын гарамын шалган бүртгэх товчоодод үзлэг хийлээ.
Эдгээр товчоодод Нийслэлийн мэргэжлийн хяналтын байцаагч-1, Сонгино хайрхан дүүргийн онцгой байдлын хэлтсээс-2, Хүрээлэн буй орчны хяналт-3, Нийслэлийн мал эмнэлгийн газар-1, Сонгино хайрхан дүүргийн Эрүүл мэндийн төв-2 зэрэг нийт 9 алба хаагч жижүүрлэн, өөрсдийн ажил үүргийн чиглэлээр ажиллаж байна.
Онцгой байдал, хүрээлэн буй орчны алба хаагчид 24-48, бусад алба хаагчид 24-72 гэсэн цагийн зохицуулалтаар ажиллаж байгаа ба хоногт ойролцоогоор 700 гаруй тээврийн хэрэгсэл нэвтэрч байгаа аж.
Алба хаагч нар байнгын гадаа хүйтэн нөхцөлд ажиллаж, хувцас хэрэгсэл, гар ариутгагч гэх мэт зүйлсээр хангагдаж байгаа ч амны хаалтны хүрэлцээ муу, ээлжийн үеийн хоол цайг өөрсдөө зохицуулж байгаа тухай ярьж байв.
Үзлэгийг МҮЭ-ийн холбооноос 2020 оны 2 дугаар сар 19-21-ны өдрүүдэд хийхээр төлөвлөсөн байна.

twitter share 0
Таны ямар жилтэй вэ?
Та Like дарж саналаа өгсөн ч таны санал нэмэгдэхгүй байвал Confirm дээр дарж саналаа баталгаажуулна уу! Та саналаа өгсөнөөр Facebook дээрээ өөрийн жилийн зурхайг хүлээн авч байх болно.
АНХААРУУЛГА: Уншигчдын бичсэн сэтгэгдэлд anews.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.